କୋରାପୁଟ ଜିଲା ନନ୍ଦପୁର ଥାନାରେ କାର୍ଯ୍ୟରତ ଜଣେ ହୋମଗାର୍ଡ ଏବଂ ଅନ୍ୟ ଜଣେ ଯୁବକଙ୍କ ମୃତଦେହ ପୋଲିସ ରବିବାର ସନ୍ଧ୍ୟାରେ ନନ୍ଦପୁର-ହାଣ୍ଡିପୁଟ ସଞ୍ଜୋଗୀ ଏମ୍ଡିଆର ୫୫ ରାସ୍ତା ଖିଲୁଆ ପେଟିଆବାଡ ପୋଲତଳୁ ଉଦ୍ଧାର କରିଛି। ମୃତକ ହେଲେ ହୋମଗାର୍ଡ ଭଗବାନ ଖରା ଏବଂ ହିକିମପୁଟ ଗ୍ରାମର ଉଗ୍ରସେନ ପାଙ୍ଗି (୩୩)।ପୋଲିସ ମୃତଦେହ ଜବତ କରି ନନ୍ଦପୁର ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ର ଶବଗୃହରେ ରଖି ଘଟଣାର ତଦନ୍ତ ଆରମ୍ଭ କରିଛି। ସୋମବାର ମୃତଦେହ ବ୍ୟବଚ୍ଛେଦ କରାଯିବ ବୋଲି ନନ୍ଦପୁର ଏସ୍ଡିପିଓ ଦେବେନ୍ଦ୍ର ମଲ୍ଲିକ ସୂଚନା ଦେଇଛନ୍ତି।
ମିଳିଥିବା ସୂଚନା ମୁତାବକ ହୋମଗାର୍ଡ ଭଗବାନ ଶନିବାର ଡ୍ୟୁଟି ସାରି ସାରେ ନିଜଘର ନୀଳ ଦୋରାପୁଟ ଯିବାକୁ ନନ୍ଦପୁର ବସଷ୍ଟାଣ୍ଡରେ ବସ୍କୁ ଅପେକ୍ଷା କରିଥିଲେ। ସେତିକିବେଳେ ହିକିମପୁଟ ଗ୍ରାମର ଉଗ୍ରସେନ ମଧ୍ୟ ଦାମନଯୋଡ଼ିରୁ କାମ ସାରି ବାଇକ୍ ଯୋଗେ ଘରକୁ ଫେରିବାକୁ ବସ୍ଷ୍ଟାଣ୍ଡରେ ଜିନିଷ କିଣାକିଣି କରିବା ବେଳେ ଦୁହିଁଙ୍କ ଭେଟ ହୋଇଥିଲା।
ଦୁହେଁ ବାଇକ୍ ଯୋଗେ ନନ୍ଦପୁରରୁ ଆସୁଥିଲେ। ହେଲେ ସେମାନେ ଘରକୁ ଫେରି ନ ଥିଲେ। ଏନେଇ ପରିବାର ଲୋକେ ଚିନ୍ତା ପ୍ରକଟ କରିବା ସହ ରବିବାର ସକାଳେ ଖୋଜା ଖୋଜି କରିଥିଲେ। ସେମାନଙ୍କୁ ନ ପାଇ ନନ୍ଦପୁର ଥାନାରେ ଦୁଇଜଣ ନିଖୋଜ ଥିବା ନେଇ ପରିବାର ଲୋକେ ଏତଲା ଦେଇଥିଲେ।
ପୋଲିସ ଦିନ ତମାମ ବସଷ୍ଟାଣ୍ଡଠାରୁ ୫ କିମି ଦୂର ହିକିମପୁଟ ଯାଏଁ ରାସ୍ତା କଡର ସମସ୍ତ ସିସି ଟିଭି ଯାଞ୍ଚ କରିଥିଲା। ଏକାଧିକ ସିସି ଟିଭିରେ ଦୁହେଁ ବାଇକ୍ ଯୋଗେ ଯାଉଥିବା ଦେଖିବାକୁ ମିଳିଥିବା ବେଳେ ହିକିମପୁଟ ସିସି ଟିଭିରେ ଦୁହେଁ ନଜର ନ ଆସିବାରୁ ପୋଲିସ ସନ୍ଦେହ କରି ରାସ୍ତା କଡ ନାଳ ଏବଂ ପୋଲ ତଳେ ସନ୍ଧାନ ଆରମ୍ଭ କରିଥିଲା।
ସେତିକିବେଳେ ଖିଲୁଆ ପେଟିଆବାଡ ପୋଲତଳେ ଏକ ହେଲମେଟ୍ ଭାସୁଥିବା ଦେଖି ଏସ୍ଡିପିଓ ଦେବେନ୍ଦ୍ର ମଲ୍ଲିକ, ଥାନା ଅଧିକାରୀ ତ୍ରିନାଥ ତୋଟାପାଡିଆ, ଏସଆଇ ବେଦୋବର ସାହୁ, ଏଏସଆଇ ଗୁପ୍ତେଶ୍ୱର ଗଉଡ, ଅଗ୍ନିଶମ ବାହିନୀ ଏଏସଓ ହେମନ୍ତ କୁମାର ସାମଲଙ୍କ ନେତୃତ୍ୱାଧୀନ ଟିମ୍ ପହଞ୍ଚି ପୋଲତଳ ପାଣି ଭିତରେ ଯାଞ୍ଚ କରଥିଲା। ଯାଞ୍ଚବେଳେ ପାଣିରୁ ଦୁହିଁଙ୍କ ମୃତଦେହ ଓ ବାଇକ୍ ଉଦ୍ଧାର କରାଯାଇଥିଲା।
ଏପରିକି ପୋଲ ଦାଢ଼ରେ ବାଇକ୍ର ଭଙ୍ଗା ହେଡ୍ଲାଇଟ ମିଳିଥିବାରୁ ବାଇକ୍ ଦୁର୍ଘଟଣା ଘଟି ଦୁଇଜଣ ପୋଲ ତଳକୁ ଖସିପଡି ମୃତ୍ୟୁବରଣ କରିଥିବା ପୋଲିସ ସନ୍ଦେହ କରୁଛି। ବ୍ୟବଚ୍ଛେଦ ରିପୋର୍ଟ ଆସିବା ପରେ ଘଟଣାର ସତ୍ୟାସତ୍ୟ ଜଣାପଡ଼ିବ ବୋଲି ଥାନା ଅଧିକାରୀ ତ୍ରିନାଥ ତୋଟାପାଡ଼ିଆ ସୂଚନା ଦେଇଛନ୍ତି। ଅନ୍ୟପକ୍ଷେ ହିକିମପୁଟ ଓ ନନ୍ଦପୁର ଥାନା ପରିସର ଶୋକାକୁଳ ପରିବେଶ ସୃଷ୍ଟି ହୋଇଥିଲା।